சாட்டை படம் மூலம், பல ஆண்டுகாலமாகப் பின்பற்றப்படும் கல்விக்கொள்கைக்கு எதிராகக் கசையடி கொடுத்த சமுத்திரக்கனி, பெட்டிக்கடை மூலம் கார்பரேட்டுக்கு எதிராக சாட்டையைச் சுழற்றுகிறார்.
லஷ்மி கிரியேசன்ஸ் பட நிறுவனம் மிகவும் பிரமாண்டமாகத் தயாரிக்கும் பெட்டிக்கடையை இயக்குகிறார் இசக்கி கார்வண்ணன்.
சமுத்திர பாண்டி என்கிற புரட்சிகர சிந்தனை உதாரணபுருஷன் என்று சொல்லத்தக்க "வாத்தியார்” ஆக நடிக்கிறார், நாயகன் சமுத்திரக்கனி. மொசக்குட்டி படத்தில் நடித்த வீரா இன்னொரு நாயகனாக நடிக்கிறார். சாந்தினி , சுந்தர் அஸ்மிதா, வர்ஷா ஆகியோர் நாயகிகளாக நடிக்கின்றனர்.
இவர்களுடன் நான் கடவுள் ராஜேந்திரன், ஆர்.சுந்தர்ராஜன், திருமுருகன், செந்தி ஆர்.வி.உதயகுமார், ராஜேந்திர நாத், ஐஸ்வர்யா ஆகியோர் நடிக்கும் பெட்டிக்கடைக்காக நா.முத்துக்குமார், சினேகன், இசக்கி கார்வண்ணன் பாடல்கள் எழுத மரியா மனோகர் இசையமைக்கிறார்.
பெட்டிக்கடையைத் தயாரிப்பதுடன் கதை, திரைக்கதை, வசனம், எழுதி, இயக்கும் இசக்கி கார்வண்ணனிடம் படத்தைப் பற்றி கேட்டபோது,
நாம் ஒவ்வொரு தெருவிலும் பார்க்கும் பெட்டிக்கடைகள் தான் ஒரு நாட்டின் பொருளாதார வளர்ச்சியை மேம்பட வைக்கும் காரணிகள்.
ஒரு பெட்டிக்கடை வைத்திருப்பவர் எந்த சாதிக்காரர்களாக இருந்தாலும் எந்த மதத்தை சேர்ந்தவராக இருந்தாலும் நாம் அன்பாக " அண்ணாச்சி " பாய்" "செட்டியார்" என்று எதோ ஒன்றை சொல்லி அழைப்போம்.
அந்த தெருவில் நடக்கும் நல்லது கெட்டதுகளில் அந்தக் கடைக்காரரும் ஒரு அங்கமாக இருக்கும் அளவிற்கு, வியாபாரி , வாடிக்கையாளர் என்பதை மீறி ஒரு உறவுப்பிணைப்பு இருக்கும். கார்ப்பரேட் முதலாளிகளால் இந்தப் பிணைப்பு சிதைந்துபோய்விட்டது கண்கூடு.
சாதாரண பெட்டிக்கடையில் விற்கப்படும் காய்கறிகள், பழங்கள், மளிகை பொருட்கள் குறைந்த அளவு கொள்முதல் செய்யப்படுவதுடன் அவை, உடனே விற்றும் விடுவதால் யாருடைய ஆரோக்கியமும் பாதிப்படைவதில்லை.
ஆனால் கார்ப்பரேட் நிறுவனங்கள் மொத்தமாக கொள்முதல் செய்து, மெதுவாக விற்பனை செய்வதால் ஆரோக்கியச் சீர் கேடு ஏற்படுகிறது. இது புரியாமல் ஆடம்பர மோகம் கொண்டவர்களால் எப்படியெல்லாம் பெட்டிக்கடை உறவு சங்கிலி அறுபட்டது என்பதையும் கார்ப்பரேட் அட்டூழியத்தையும் தோலுரித்து காட்டும் படமே பெட்டிக்கடை…
என்றார்.
திருநெல்வேலி, சென்னை, கன்னியாகுமரி, தூத்துக்குடி போன்ற இடங்களில் படமாக்கப்பட்ட பெட்டிக்கடை படத்தின் இசைவெளியீட்டு விழா விரைவில் நடைபெறவுள்ளது.
அருள், சீனிவாஸ் ஆகியோர் ஒளிப்பதிவு செய்யும் பெட்டிக்கடை படத்தில், வின்செண்ட் விமல் நடனங்களை அமைக்க, மிராக்கிள் மைக்கேல் சண்டைப் பயிற்சினை வழங்குகிறார்.
