ஷாலோம் ஸ்டுடியோஸ் ஜான்மேக்ஸ், ஜோன்ஸ் இருவரும் இணைந்து தயாரிக்க, பரத் நாயகனாக நடிக்கும் பொட்டு படம் மார்ச் 8 ஆம் தேதி 1000 திரையரங்குகளில் வெளியாகிறது. நாயகிகள் நமீதா, இனியா, சிருஷ்டி டாங்கே ஆகியோருடன் தம்பி ராமய்யா, பரணி, நான்கடவுள் ராஜேந்திரன், ஊர்வசி, நிகேஷ்ராம், ஷாயாஜிஷிண்டே, மன்சூரலிகான், ஆர்யன், சாமிநாதன், பாவாலட்சுமணன், பயில்வான் ரங்கநாதன் நடிக்கிறார்கள்.
விவேகா, கருணாகரன், சொற்கோ மற்றும் ஏக் நாத் ஆகியோர் எழுதிய பாடல்களுக்கு இசையமைக்கிறார் அம்ரீஷ். இனியன் ஹரீஷ் ஒளிப்பதிவு செய்யும் பொட்டு வை எடிட் செய்கிறார் எலீசா. சண்டைப்பயிற்சிகளை சூப்பர் சுப்பராயனும் கலையை நித்யானந்தும் கவனிக்க, நடனமைக்கிறார் ராபர்ட். விசி வடிவுடையான் கதை திரைக்கதை அமைத்து இயக்கும் இந்தப்படத்திற்கு வசனங்கள் எழுதுகிறார் செந்தில்.
”பரத் நடித்த படங்களிலேயே இந்த படம் தான் முதன் முறையாக 1000 தியேட்டர்களில் ரிலீஸ் ஆகிறது. அதுவும் ஒரே நேரத்தில் தமிழ், தெலுங்கு, ஹிந்தி என மூன்று மொழிகளில் வெளியாகிறது. கேரளா, கர்நாடகா போன்ற இடங்களில் நேரடியாக தமிழ் ரிலீஸ் செய்கிறோம்.
மருத்துவக் கல்லூரி பின்னணியில் படு பயங்கரமான ஹாரர் படமாக உருவாகியுள்ள இந்த படத்தில் பரத் பெண் வேடத்தில் நடித்துள்ளார், அதற்காக, மிகுந்த சிரத்தை எடுத்துக் கொண்டு, தனது உடல் மொழிகளை மாற்றி அந்த கதாபாத்திரமாக மாறி சிறப்பாக நடித்துள்ளார். அனைவரும் குடும்பத்துடன் பார்த்து ரசிக்கும் வண்ணம் உருவாகியுள்ளது பொட்டு..” என்றார் இயக்குனர் வடிவுடையான்.
